Xiaomi Watch S1 Active ساعة شاومى
الرد على المكالمات بصوت واضح وأشعارات بالغة العربية مظبوطه
قياس نبض واكسجين وتوتر ومتابعه النوم
جي بي اس
واى فاى
مساحه داخليه ومشغل صوت
ان اف سي
شاشه مميزه جدا
مساء الخير ازيكم
ساعه شاومي اس 1 اكتف:
بدايه كده لو أنت بتدور على ساعة سمارت سعرها يكون مناسب ويكون فيها معظم المميزات الموجودة في الساعات الغاليه فا مافيش قدامك غير ساعة شاومي اس 1 اكتيف لأنها الوحيده اللى هاتحققلك المعادلة ديه سعر واوبشن ومميزات كتير
تعالوا الاول نعمل انبوكسينج للساعه ونشوف أيه اللى فى العلبه وبعد كده هنتكلم على عن الساعة وايه اللى بيميز الساعه ديه عن الساعات اللى فى نفس رنج الفئة السعرية بتاعتها
طيب أيه بقى اللى بيميز الساعة ديه
فيه كذا ساعه سمارت تقدر ترد بيها على المكالمات وصوت واضح واشعارات مظبوطة فا في كذا اختيار قدامك بس علشان تاخد أوبشن ومميزات اعلى فا مش هاتلاقى زى ساعه ……
يأما تروح لفئة سعريه أعلى بكتير
لاكن فى نفس الفئة السعرية ديه دايما هاتلاقي فيه مميزات واوبشن مش موجود زى مثلا القياسات الحيويه مش دقيقة دقيقه ومافيش جي بي اس في الساعه ومافيش واى فاى أو مافيش مساحة داخليه وماتقدرش تشغل مقاطع صوت وموسيقى من عليها مباشرة والميزه دية موجوده فى ساعة شاومى اس 1 اكتيف وتقريبا ديه معلومه ماحدش يعرف عنها حاجه حتى اللى بيبعوا الساعه كنت بسألهم كانوا بيقولوا ان مافيهاش مساحه داخلية بس الساعه فيها مساحه داخليه وده اكيد من خلال التجربه الفعليه بس لازم تعمل تحديث للساعه علشان الميزه ديه تشتغل وينزل مشغل الموسيقى عليها
خلينى أستعرض معاكم مميزات ساعة شاومى اس 1 اكتف ورأى الشخصى فى الساعه من خلال التجربه الفعلية لمدة 6 شهور:
1- نبتدى بــ البطاريه بطاريه الساعه 470 مللى امبير بتقعد بعد ما تتشحن بشكل كامل.. لمده 5 ل 7 ايام حسب الاستخدام وبتشحن من 0 ل 100% فى خلال ساعتين ونص تقريبا. وده من واقع التجربه.. بس على كلام الشركه والموقع بتاعها انها بتقعد حوالى 12 يوم فى وضع الاستخدام النموذجى و24 يوم فى وضع توفير الطاقه بس أنا ماوصلتش للارقام ديه خالص
2- بالنسبة للشاشة فا هيه 1.43 بوصة عالية الدقة بحواف بسيطه جدا و تردد 60 هرتز والوانها مميزه لانها شاشة اموليد واضائتها كويسه وواضحه تحت ضوء الشمس، وبتدعم الـ وضع الشاشة المستمر always on display
3- الساعه بتظهر المكالمات وممكن ترد علي المكالمة أو أن انت تكنسل، تقدر من خلال الساعه ان انت تتصل بأخر ارقام اتصلت بيك. بس مافيش فيها لوحه ارقام علشان تتصل من خلالها ومافيش فيها أمكانية حفظ جهات اتصال وديه حاجه من الحاجات اللى ماحبتهاش بس ممكن الامكانيه ديه تنزل فى تحديث السوفت وير الجديد الخاص بالساعة..
بالنسبة للصوت فا هو كويس جدا أنت سامع كويس اللى بيكلمك وهوه سامعك كويس لو فى مكان فاضى وهادى مش محتاج تقرب السماعه قريب من وشك وانت بتتكلم انا كنت ماشى فى شارع هادى وكنت بتكلم وايدى جنبى.. لكن لو مكان زحمه شويه ودوشه لازم تقرب ايدك علشان تسمع اللى بيكلمك وهوه يسمع صوتك كويس
3- كل التنبيهات بتوصلك مظبوطة باسم الابليكيشن مظبوط و الرسائل بتوصل كاملة بأسم المرسل لاكن فى الجروبات بتوصل باسم الجروب نفسه ومش بيبان مين اللى من الجروب اللى بعت الرسالة وبتدعم الرسائل العربى بدون أى مشاكل
بس مافيش أنك ترد على الرسايل ولا حتى برسايل جاهزه
وتقدر تخصص من ابليكيشن شاومي على الموبايل الخاص بالساعة اية التنبيهات اللى انت عايز تستلمها وايه اللى مش عايزها توصلك
4- القياسات الحيوية فيها بيقال أنها دقيقه ماقارنتهاش بأجهزه طبيه معتمدة بس فيه فيديوهات منتشره بتقول ان النتايج متقاربة والفروقات بسيطه ومن خلال استخدامى لما اكون بلعب رياضه او بجرى فا عدد ضربات القلب بيزيد وبيقل حسب المجهود اللى بعمله بس عن نفسي وقت الجد لو محتاج قياسات والمسألة حياه او موت مش هاعتمد عليها اكيد
الساعه بتقيس ضربات القلب ومعدل الاكسجين فى الدم وبتقيس التوتر وبتابع نومك ودرجاتة وجودة النوم وكل البيانات ديه بتتسجل على ابليكيشن شاومى على الساعه علشان تقدر ترجع لها. من خلال تجربتى للساعة لاقيت ان متابعه النوم كويسه جدا.. لو أنا مثلا قلقت فى وسط النوم وبعد كده رجعت كملت نوم بلاقى أن لما أصحى الصبح أن ده أتسجل وبالتفصيل على الابليكيشن أنى قلقت من النوم وأمتى أنا قلقت وامتى رجعت تانى للنوم وحتى على الساعة هاتلاقى شويه بيانات عن نومك كان عامل ازاى بس مش بشكل مفصل زى الابليكيشن
5- الساعة بتتعرف لوحدها على أن انت بتمارس رياضة أو بتمشي مثلا وتسألك أنت عايز تسجل بيانات ومعلومات عن الرياضة اللى بتمارسها دلوقت؟ وتسجل خطواتك والمسافة اللي مشيتها والطريق اللى مشيته على الخريطة من خلال ال جى بى اس اللى موجود فى الساعة وده مش موجود فى ساعات كتير قريبة فى السعر من الساعة ديه وفيها أوضاع رياضية كتير حوالى 117 وضع رياضي بس أنا بصراحة مش بستخدمهم
6- الساعة مقاومة للمياه لحد 5 بار ضغط مية يعنى حوالى 5 متر تحت سطح المية بس خد بالك فيه عوامل تانيه بتأثر على قدرة تحمل الساعة للمية.. زى مثلا درجة حرارة المية والمية عازبة ولا مالحة وكذا حاجة وكل ده مافيش معلومات عنه مفصله فا الافضل ماتعرضهاش للمياه بشكل كبير ومتواصل
7- الساعة بتدعم الأوامر الصوتية أليكسا بس الخدمة مش شغاله فى مصر فا ماعرفتش اجربها
8- الساعه بتدعم الدفع عبر الساعه بأنك بتسجل بيانات الكريدت كارد بتاعك على الابليكيشن اللى على الموبايل اللى مربوط بالساعة وتقدر تدفع عن طريق الساعة والاتصال عن بعد الــ NFC بس للاسف الخدمه ديه مش شغالة فى مصر وحتى فى بلاد تانيه لسة ماشغلتش فيها الخدمة دية بس موجودة فى الساعة وقت ماتشتغل هاتلاقيها
9- الساعه فيها متابعة للدورة الشهرية الخاصة بالسيدات
10- وزى ماقولنا فى الأول الساعه فيها مساحة داخلية 2 جيجا ودية معلومة تقريبا مش معروفة والمساحة ديه بتكون مش واضحة أو مختفيه بس أول ما تحدث السوفت وير الخاص بالساعة هاتقدر تحط أغانى ومزيكا على الساعة من خلال الابليكيشن على الموبايل وتقدر توصل الساعة مباشرة بسماعات البلوتوث من غير ماتحتاج الموبايل يعنى تقدر تنزل تجرى أو تروح تمرينك بالساعه والسمعات فقط وتسمع مزيكا زى ماتحب
11- الساعة فيها قياس ضغط الجو - وقياس الارتفاع - و بوصلة - و منبه - و ستوب ووتش - وكشاف من خلال الشاشة بيخليها تنور بالكامل - وفيها تمرين تنفس - فيها التحكم بكاميرا الموبايل علشان تصور من غير ما تمسك الموبايل - فيها wifi مش لاقى ليه استخدام لحد دلوقت ومافيش اى معلومات عنه حتى على الصفحه الرسمية للشركة بس فى الغالب بيستخدم فى تحديث السوفت وير الخاص بالساعة
12- الساعة ليها خلفيات ووشوش كتير جدا تختار منهم وفيه وشوش بيكون معاها خلفيات always on display لأن كان فيه ناس بتقول أن مافيش غير 2 أو 3 always on display بس وأن كلهم ساعات بيكونوا ساعات ديجيتال أرقام بس مافيش ساعات عقارب بس الواقع غير كده هما أكتر من 3 وفيهم ساعات بعقارب تقدر تخليها always on display حسب الوش اللي مستخدمه للساعة
13- ممكن تنزل على الساعة نفسها ابليكيشن وبرامج مخصص ليها من خلال ابليكيشن شاومى اللى على الموبايل بس هما 3 ابليكيشن فقط اللى متاحين لحد دلوقت وبصراحة ملهمش لازمة.
أخيرا وصلنا للملخص والزتونة لــ ساعة شاومي أس 1 أكتف:
الساعة حلوه جدا على سعرها مقارنة بالمنافسين ده أقل سعر ساعة سمارت تديلك كل الاوبشن والمميزات دية معظم الساعات اللى فى رينج السعر ده او اقل شوية مش هتلاقى فيها WIFI - ولا GPS - ولا NFC - ولا مساحه داخليه و امكانية تشغيل صوت مباشره من الساعة ولا شاشة بالجودة دية.
لو محتاجين أعمل ريفيو لجهاز معين أو لو محتاجين شرح لحاجه أكتبولى فى الكومنتات، وماتنسوش اللايك والشير والأشتراك عشان ده هايساعدنى اعمل ريفيوهات لمنتجات اكتر.
Comments
Post a Comment